La orchestre dai zovins de Europe e siere a Pordenon

A saran i passe cent zovins musiciscj de Gmjo-Gustav Mahler Jugendorchester a sierâ la programazion estive dal Teatri “Verdi” di Pordenon cun doi concierts in esclusive, in program lunis ai 2 e miercus ai 4 di Setembar. La Orchestre, che e met adun une selezion dai orchestrâi europeans plui talentuôs in circolazion, fondade intal 1981 di Claudio Abbado, e jere stade in residence fint ae metât di Avost a Pordenon par preparâ il grant tour european dal Istât, chest an sot de direzion dal grant diretôr Ingo Metzmacher. La Orchestre e à sunât intes setemanis passadis tes rassegnis plui innomenadis, di Salisburc a Amburc, Amsterdam e Berlin. E cumò e torne a Pordenon cuntun conciert che al è incentrât su la Tierce Sinfonie di Bruckner, a 200 agns de nassite, e chel altri invezit al è dedicât a une des oparis plui impuartantis di Šostakovič: la Sinfonie n. 8 op. 65. (A.I.) – 01.09.2024