La orchestre dai zovins e torne a Pordenon

Sierade cun sucès la prime esperience di residence aviertane de Gustav Mahler Jugendorchester cul conciert dai 19 di Mai al Teatri Verdi di Pordenon diret di Daniele Gatti, che al à screât il so tour european, i 120 musiciscj di dute Europe de plui famose e celebrade orchestre dai zovins dal mont a stan par tornâ ospits dal teatri e de citât di Pordenon. La lôr ‘residence’ estive e je programade dai 3 ai 13 di Avost e si sierarà ai 18 cuntun conciert diret di Jakub Hrůša, dedicât ae Sinfonie n.9 di Gustav Mahler. Lis prevenditis par chest conciert a son viertis za in linie e in bilietarie (www.teatroverdipordenone.it; 0434.247624). La GMJO e proponarà ancje doi concierts speciâi ‘decentrâts’ a Tumieç e a Glemone ai 10 e ai 11 di Avost. (A.I.) – 19.06.2023