La orchestre e sune inte jentrade dal Ospedâl di Udin

La orchestre Audimus, che di passe dîs agns e lavore sul teritori pe divulgazion de culture musicâl sinfoniche, massime in lûcs dulà che par solit no rive, e presente doi concierts pal Avent in puescj speciâi. Il prin, sabide ai 16, si tignarà li dal centri “Magredi” di S. Quarin di Pordenon, intant che domenie ai 17 il grup orchestrâl diret di Francesco Gioia al sarà te jentrade principâl dal Ospedâl S. Marie de Misericordie di Udin, parcè che, cemût che al dîs il stes diretôr, “la musiche e scuen e e pues tocjâ lis cuardis plui profondis dal anim uman. E je une art svoladie, che però e cjarece la nestre cussience e e rive a zontâ i estrems, la gjonde e il dolôr, intune unitât intime e profonde”. (A.I.) – 15.12.2023