La regjiste Archibugi ospite speciâl tal festival di Spilimberc

Martars ai 4 tal festival “Le giornate della luce” (Lis zornadis de lûs) di Spilimberc, e je programade la proiezion di un classic dal cine talian: “Il grande cocomero” di Francesca Archibugi, aes 9 sot sere tal cine “Miotto”. Ispirât ae esperience di Marco Lombardo Radice, neuropsichiatri inovatîf, il cine al à vinçût un premi pai “Nastri d’argento” e trê David di Donatello. A presentâlu, la stesse regjiste Francesca Archibugi, che chest an e je la protagoniste dal focus “A altece di frut”, dedicât ai regjiscj che compagn di jê a àn savût valorizâ la presince dai piçui interpretis sul grant schermi. La zornade dal festival si vierzarà za aes 10 di matine cul documentari “Custodi” di Marco Rossitti, zirât de Cjargne ae lagune di Maran passant pai magredis. (A.I.) – 03.06.2024