Dopo Brussel, il cors internazionâl itinerant di perfezionament teatrâl Ecole des Maîtres, la scuele dai mestris, par atôrs e atoris europeans sot dai 35 agns, vuidade de atore, autore e regjiste belghe Anne-Cécile Vandalem, e je rivade a Vile Manin a Passarian, dulà che 16 arlêfs di Italie, Belgjiche, France e Portugal a son daûr a lavorâ a une gnove fase dal lavôr titulât “Ossessions. Rituâi, ereditât e trasmissions”. Martars ai 10 aes 7 a Vile Manin, intal spazi provis, si tignarà la presentazion al public (cun jentrade libare) dal lavôr par cheste trentesime seconde edizion. Dal 2022, il CSS Teatri stabil di inovazion dal Friûl-Vignesie Julie al condivît la cure de Ecole des Maîtres pe Italie intune cul Piccolo Teatro di Milan – Teatri di Europe. (A.I.) – 09.09.2024
Foto di L. Bica
