“La sene des feminis”, anteprime pai 8 di Març

Pe Zornade Internazionâl de Femine nol podeve mancjâ l’omaç de Compagnie di Arti&Mestieri direte di Bruna Braidotti, che di passe vincj agns e cjalcje lis senis cul intindiment di puartâ lis vôs, i pinsîrs e il cûr des feminis in teatri e fâju cognossi al public. Sabide ai 8, la compagnie e da apontament a Pordenon, li di Cucina33, par scoltâ storiis e tescj dedicâts a diferents aspiets dal univiers feminin, tocs gjavâts fûr di diviers fonts leterariis e tescj teatrâi, adun cu lis contis che a fasin part de racuelte “Quello che le donne non dicono” (Ce che lis feminis no disin). A lei i tocs, il grup di leture de compagnie formât di Bruna Braidotti, Bianca Manzari, Monica Gizzi e Tania Recca. L’avigniment al è une part de anteprime de vincjesime prime edizion de rassegne “La sene des feminis – Maris”, che e larà indevant dilunc dal an, tacant di vinars ai 21 di Març, cun spetacui e avigniments che a ziraran ator dal teme de maternitât. (A.I.) – 07.03.2025