La storie di Buffalo Bill in Friûl tal Cjistiel di Buri

Si clamave William Frederick Cody, ma pe storie al è Buffalo Bill: un om che al à vivût tai agns dal West “salvadi” in Americhe e – al somee – al à copât miârs di bisonts par dâ di mangjâ ai operaris de ferovie. Personaç storic innomenât, ma cuntune vite di liende, nassût tal 1846 e muart tal 1917, al fo ancje l’ideadôr di une sorte di circ spetacul, il “Wild West Show”, là che a jerin oms de frontiere e indians, bestiis e cetant altri. Buffalo Bill al fo dôs voltis in Italie: la seconde, tal 1906, al rivà ancje a Udin, cun sessante vagons feroviaris, daûr des cronichis, a jerin passe 20 mil spetatôrs ai siei spetacui, in Zardin grant o li dongje. Chê storie plene di liende e je stade metude dongje dal scritôr e dramaturc udinês Valerio Marchi, par un spetacul, “Buffalo Bill, storia e leggenda: dal Far West fino a Udine e Trieste”, che al à za vût un bon acet de bande dal public. Miercus ai 9, tal Cjistiel di Buri aes 8.30 sot sere, il spetacul al sarà presentât di Valerio cun sô fie Michela Marchi, cun Alessio e Giuliano Velliscig ae part musicâl. (A.I.) – 08.10.2024