La vuere e la libertât di sielte al Teatri “Giovanni da Udine”

Al Teatri gnûf “Giovanni da Udine”, pe rassegne “Tempi unici,” martars ai 4 al rive “Diplomazia”, un spetacul di Elio De Capitani – in sene cun Ferdinando Bruni – e Francesco Frongia, in program aes 11 pes scuelis e aes 8.45 sore sere. Te gnot dai 24 ai 25 di Avost dal 1944, il consul svedês Raoul Nordling e il gjenerâl Dietrich von Choltitz, governadôr di Parîs dilunc de ocupazion naziste, si frontin intun scuintri verbâl. Il gjenerâl al à vût l’ordin perentori di Hitler di minâ i puints, distruzi ae albe la citât e sterminâ i abitants. Il consul al dopre dute la sô capacitât dialetiche e la sô art diplomatiche par convincilu a disubidî al Führer. Libertât di sielte e logjichis di vuere, valôrs individuâi e umanitaris cuintri i oblics di dissipline a son i grancj temis dal Nûfcent dibatûts, atuâi in maniere tragjiche te Europe di vuê. (A.I.) – 03.04.2023