L’amôr ‘di scuindon’ tal teatri di Monfalcon

Dôs seradis cui “Amants” tal Teatri Comunâl Marlena Bonezzi di Monfalcon: chei di “Amanti”, la gnove comedie di Ivan Cotroneo, interpretade di Massimiliano Gallo e Fabrizia Sacchi, in sene martars ai 21 e miercus ai 22 pe stagjon promovude de aministrazion comunâl e dal Circuit dal ERT. E je une comedie brilante e di ridi sul amôr, sul ses, sul tradiment e sul matrimoni, su lis relazions “clandestinis” e di scuindon di lungje durade e su lis aventuris che a finissin subite, sul masculin e sul feminin, e in definitive su la ricercje de felicitât che e cjape simpri stradis diviersis di chês previodudis. (A.I.) – 21.01.2025