“L’Arlecchino errante” al partìs cul teatri intun sît dal Unesco

Il teatri intun sît tutelât Unesco, tra testemoneancis preistorichis e coinvolziment dai abitants: il spetacul “Fili de Seta”, che al larà in sene dongje de jentrade dal Palù di Cjanive sabide ai 27 aes 7 e 45 di sere, al è la anticipazion dal program dal festival “L’Arlecchino errante”. Il spetacul al è il risultât di un laboratori inmaneât de compagnie Teatro Astragali, che al à cjapât dentri i abitants dal lûc (un grup di citadins di Cjanive di diviersis etâts), compagn che al fâs di plui di trente agns intes comunitâts e intes culturis di dut il mont, fintremai in 35 nazions diviersis. Il sît palafiticul dal Palù, datât almancul 5.000 p. di C., al è dal 2011 inte liste dal Patrimoni mondiâl Unesco, adun cu la vicine Polcenic. (A.I.) 25.08.22