Al continue il viaç musicâl di “Armonie in Città”, inmaneât de Fondazione Bon, che martars ai 13 al spiete il public intune gnove tape intes glesiis di Udin. La Glesie dal Sacro Cuore a sarâ il palc, aes 8.45 di sere, dal Trio Gaubert, un grop formât de violiniste Giulia Scudeller, dal flautist Alessandro Cetr e de pianiste Marina Miani: musiciscj zovins, che a son daûr a concludi il perfezionament strumentâl li di academiis europeanis impuartantis e che intal stes timp a àn za une fuarte ativitât tant che soliscj. Tra lis navadis de glesie, un program che al vûl passâ diviersis epochis: dal baroc al ‘900, cun riferiments ae musiche popolâr, tocs di Bach, Rota, Martinu e di Gaubert, il compositôr francês che il tercet al à dedicât il propri non. (A.I.) – 12.09.2022
