“Di peraulis precisis si vîf” al è un viers dal toc “Discanto” di Ivano Fossati che Lella Costa e à sielt par completâ il titul dal “so” Otello, il spetacul scrit di William Shakespeare, che al torne sul palc intune version rivisitade a cuasi un cuart di secul de prime volte. “Otello, di precise parole si vive” al sarà ospit in sîs teatris dal Circuit dal ERT, tacant di martars ai 12 dal Teatri Maurensig di Tavagnà pe stagjon di prose realizade cu la Fondazion Bon di Culugne. La storie “di un lavoradôr forest une vore cualificât, di un matrimoni miscliçât, di un ûs sfaçât dal lengaç e di un feminicidi cun suicidi dal colpevul” – il struc al à de autore e atore – al larà po dopo miercus ai 13 tal Teatri Benois-De Cecco di Codroip, joibe ai 14 a S. Vît dal Tiliment, vinars ai 15 li dal Lavaroni di Dartigne, sabide ai 16 a Grau e domenie ai 17 a Mugle. (A.I.) – 11.11.2024
Foto di S. Serrani
