Marco Risi e i conseis di un zovin mestri: Enrico Galiano

Presentât al festival di Turin 2023, al rive intes salis de regjon “Il punto di rugiada” (“Il pont di rosade”), il gnûf cine di Marco Risi. Al sarà propit il regjist a presentâ il cine al public, joibe ai 18 di Zenâr li dal Visionario di Udin, vinars ai 19 li dal Kinemax di Gurize e po dopo tal Cinemazero di Pordenon. Il regjist al sclarìs che a jerin plui o mancul tredis agns che “o pensavi a chest cine sui vielis e, intant, si pues dî che o soi deventât vecjo ancje jo. Un dì o jeri a Pordenon a un incuintri pal cine ‘Fortapàsc’. Un zovin mestri di scuele che intant al è deventât un scritôr di sucès, Enrico Galiano, mi fevele de sô esperience di agns prime, intune cjase di ricovar, tant che alternative al servizi militâr: chês contis mi son ladis dentri e o ai sintût daurman che al jere materiâl par fâ un romanç o un cine”. (A.I. – 16.01.2024)