Momi, une vôs furlane in gare a “Musicultura”

E je ancje une vôs furlane te trentesime seste edizion di Musicultura, il concors prestigjôs – nassût par volontât di grancj nons de musiche taliane tacant di Fabrizio De Andrè – che al scandaie e al promôf lis espressions plui autentichis de creativitât musicâl zovine, intal segn di un ricambi gjenerazionâl fondât sul merit artistic. Dopo trê mês par valutâ lis 2.352 cjançons partecipantis, lis propuestis che dai 6 ai 15 di Març a saran presentadis a Macerata a son 60. Tra chestis la furlane Momi, ven a stâi la udinese Monica Comisso, che in Zenâr e veve publicât il so prin singul “Tiare”. Vie pes audizions dal vîf a Macerata a saran sielts i 16 progjets artistics finaliscj, che a vignaran presentâts tal Teatri Persiani di Recanati vie pe Vierte. (A.I.) – 06.03.2025