Monolic par un om disgraciât

Ultin apontament de sezion “Gnovis scrituris” dal cartelon di prose dal Teatri “Verdi” di Pordenon. Joibe ai 11 al va in sene un spetacul di e cun Mario Perrotta, “Un bès – Antonio Ligabue”, cul atôr di bessôl in sene par contâ il gjeni no simpri capît, ma soredut la infelicitât di un om disgraciât, Antonio Ligabue (1899-1965), tra i pitôrs plui grancj dal secul vincjesim. Il monolic di Perrotta, figure tra chês plui interessantis dal panorame teatrâl talian contemporani, al à vuadagnât za premis impuartants, di là dal sucès di public e de critiche. (A.I.) – 10.04.2024