Musichis di ca e di là dal confin

A van indevant i concierts de seconde part di “LIVE – Musiche di Sconfine”, un progjet nassût intal 2009 cu la idee di meti dongje i zovins e la musiche e promovi i scambis culturâi cu la Slovenie e altris culturis dal mont. Cheste volte si torne in Italie par esplorâ il tropicalisim, dal polistrumentist brasilian Ricardo Dias Gomes tra vôs, eletroniche e bas. La esibizion si tignarà sabide ai 22 a Gurize tal circul Arci Gong, che al colabore cul grup di ricercje DobiaLab. Ricardo Dias Gomes al è un stimât inovadôr de sene musicâl di Rio de Janeiro fint de metât dai agns ’90 e al è cognossût soredut pal so lavôr sui albums aclamâts de critiche che il cjantautôr brasilian Caetano Veloso al à publicât ae fin dai agns 2000. (A.I.) – 21.06.2024