Musichis di orghin dal vîf par un cine dal 1918

Segnât di cuatri episodis leâts ae vite di S. Francesc, il cine storic “Frate sole”, scrit di Mario Corsi e diret di Ugo Falena intal lontan 1918, al è un esempli memorabil de grande produzion dal cine talian tai prins agns dal ‘900. Inte suaze dal percors dedicât a Francesco d’Assisi, il program de trentesime tierce edizion dal Festival internazionâl di musiche sacre, in colaborazion cul Festival organistic di Udin, al dediche une serade speciâl ae riscuvierte di chest cine, traviers la proiezion joibe ai 24 intal Domo di Codroip. Cuntune colone sonore straordenarie dal vîf: chê dal conciertist internazionâl Ferruccio Bartoletti, che al proponarà un coment musicâl de pelicule cuntune secuence di improvisazions organistichis. (A.I.) – 23.10.2024