Musichis par grancj virtuôs intal non di Berio

Al è in program miercus ai 16 tal Teatri Gnûf “Giovanni da Udine” il tierç e ultin apontament dal percors di svicinament e di cognossince des oparis di Luciano Berio fra musiche, intervistis e testemoneancis audio e video. La rassegne, pensade par svicinâ il public ae personalitât e al gjeni di un dai paris de musiche dal Nûfcent intal centenari de nassite, al pontarà cheste volte i rifletôrs su cualchi pagjine iconiche de produzion musicâl di Berio, lis Secuencis VIII, XIV, XIII Chanson e III scritis di pueste par grancj virtuôs. A sunâ a saran cuatri artiscj esperts in chest repertori tant dificil: Francesco D’Orazio (violin), Claudio Pasceri (violoncel), Teodoro Anzellotti (armoniche) e Alice Rossi (sopran). (A.I.) – 15.04.2025