Musiciscj zovins a Pordenon cu la Orchestre regjonâl

Miercus ai 13, i concierts par piano e orchestre di Ludwig Van Beethoven a saran i protagoniscj dal conciert gratuit intal Auditorium “Concordia” di Pordenon. Sul palc, acompagnâts de Fvg Orchestra direte dal mestri Paolo Paroni, i siet pianiscj che a àn a pene sierât il prin cors di specializazion dedicât ae esecuzion par piano solist e orchestre de AAMI, la Alpe Adria Music Institute. AAMI al è il prin e unic progjet in Friûl-Vignesie Julie dedicât ae alte formazion dai musiciscj zovins, che al propon ai compositôrs, ai pianiscj e ai diretôrs di orchestre di doman un percors di perfezionament cun grancj insegnants, lavorant a contat strent cuntune orchestre sinfoniche professionâl, in graciis de colaborazion cu la sinfoniche regjonâl, la Fvg Orchestra. (A.I.) – 12.12.2023