“Nativitas”, la tradizion des corâls di Nadâl in regjon

Cu la prime domenie di Avent e torne “Nativitas”, la preseade rêt di avigniments corâi des fiestis, promovude de Usci dal Friûl-Vignesie Julie. E je une manifestazion dai numars grancj cun passe 150 apontaments, chê plui leade aes tradizions dal teritori, chê che e jentre a contat cu lis comunitâts locâls intai borcs e intes citâts de regjon. La vincjesime tierce edizion e tacarà il prin di Dicembar, par lâ indevant fint ai 14 di Zenâr. I avigniments, concentrâts tal principi intai fin de setemane, si fasaran plui fis intes zornadis di fieste, par compagnâ, tant che ogni an, il public intai percors musicâi plui varis. A fasin part dal program concierts, messis cjantadis, avigniments itinerants che a rinovin tradizions antighis: la colone sonore des fiestis par un totâl di 122 concierts e di 31 celebrazions liturgjichis. (A.I.) – 30.11.2023