Palio studentesco, a tachin i cors di formazion

Daspò dal sucès te edizion passade, a tornin ancje chest an i laboratoris di svicinament al lengaç teatrâl inmaneâts dal Teatro Club di Udin. Tant che ogni an, intal periodi che al ven prime e dopo dal Palio teatrale studentesco, a son diviersis lis iniziativis di formazion e aprofondiment culturâl che a compagnin e a supuartin la preparazion dai spetacui in program pal festival. In viste de cincuantesime tierce edizion de manifestazion culturâl zovine plui amade de citât, a scomencin i gnûfs laboratoris par ducj i students e lis studentessis di Udin e de ex provincie. Cun chescj laboratoris, tignûts di Ornella Luppi e Sonia Pellegrino Scafati, sedi cui che al fâs part dai grups dal Palio, ma ancje ducj chei altris, a varan la pussibilitât di sperimentâ un lavôr diviers di chel che si fâs dentri dal grup teatrâl de proprie scuele. Il fin principâl al è chel di formâ un grup cence vê l’obietîf di meti in sene un spetacul finâl par creâ un percors di ricercje e di sperimentazion. Il prin incuintri al sarà sabide ai 25. (A.I.) – 22.11.2023