Paolo Rossi a Osôf al fâs ridi e pensâ

Ridadis, ma ancje moments di riflession intune misture esplosive di comicitât e poesie. Al rive joibe ai 6 sul palc dal Teatri di Osôf, pe stagjon di Anà-Thema Teatro, “Operacce Satiriche” (Oparatis Satirichis), il spetacul di e cun Paolo Rossi, che al cumbine il lengaç teatrâl cu la cjançon popolâr cuntune satire becante e incisive. Compagnât sul palc di musichis dal vîf, il comic al conte lis “oparatis satirichis”, creazions stravagantis che a nassin di diviersis ispirazions, intun viaç che al unìs tradizion e contemporaneitât. Simpri cuntun lengaç scoret, svariât, plen di strupiadis, peraulis e sugjestions strambis, ma comprensibil par ducj. (A.I.) – 05.03.2025