Paschalia: i dîs de musiche intes glesiis

Cu la Setemane sante al è rivât ancje il moment de programazion plui penze pe rêt regjonâl di concierts corâi e di celebrazions “Paschalia”. Di miercus ai 16 fint al dì di Pasche, la USCI dal Friûl-Vignesie Julie e invide a une lungje serie di apontaments cu la musiche corâl dedicâts a chest moment particolâr dal an liturgjic. La viertidure in provincie di Udin e sarà intal domo di Tisane, dulà che il Grup polifonic “Claudio Monteverdi” al fasarà la “Passione di Christo secondo Giovanni” di Francesco Corteccia, intant che Vinars sant, la Corâl Fogolâr e acompagnarà la Vie Crucis inte glesie di Cuar di Rosacis. Trê lis messis di Pasche dentri dal calendari di Paschalia: a Pasian di Prât, intal domo di Glemone e tal stes paîs intal santuari di S. Antoni. In provincie di Pordenon, si tache miercus ai 16 cuntun “conciert meditatîf” a Culture di Polcenic, “Passio Christi”, proponût de associazion musicâl I Notui. (A.I.) – 15.04.2025