Passe cent zovins a teatri, sul palc e daûr

No dome il palc ‘classic’, cui atôrs in sene e i spetatôrs denant, ma pardabon un laboratori artistic, dulà che dute la machine teatrâl e cjape vite, pandint al public ancje ducj chei mistîrs scuindûts che a rivin a meti adun ogni spetacul. In pocjis peraulis, une rotazion a 180 grâts de sene par fâ imerzi il public inte machine organizative complesse che e lavore daûr lis cuintis, cence masse cjacaris e di buine voie. I passe 100 fantats e fantatis de cuarte edizion dai “Mestieri della scena” (Mistîrs de sene), ducj sot dai 35 agns, a contaran dal vîf la lôr esperience intal mont dal artesanât artistic, miercus ai 20 tal Teatri S. Zorç di Udin. Chel stes mont che in graciis dal Teatro Club di Udin, pe direzion artistiche di Paolo Nikli, al à contât e fat vivi in prime persone dutis lis professions che a stan “daûr” dal teatri. (A.I.) – 19.11.2024