Pianos pronts pe seste edizion di “Piano City” a Pordenon: passe otante concierts e cent pianiscj par une imersion di trê dîs inte musiche classiche, jazz, contemporanie e “crossover”, che e invadarà la citât. Tancj i progjets speciâi, simpri a jentrade sore nuie tant che ducj i concierts dal Festival, che a fasaran scuvierzi al public gnovis sonoritâts, grancj classics e novitâts discografichis. Il teme de seste edizion al è chel dal cambiament, pussibil dome traviers il scambi. L’apontament plui spietât cu la sperimentazion e cu lis contaminazions al è dal sigûr “Piano con l’elettronica!” (Plan cu la eletroniche!)”: vinars ai 21 di Jugn aes 5.45 dopomisdì, cun Ciro Longobardi e Roberto Doati intune anteprime mondiâl. Il conciert che al sierarà il Festival domenie ai 23 si intitule propit “Change”, cambiament, e al viodarà sul palc Uri Caine, musicist al plui alt nivel dal jazz contemporani di passe 30 agns. (A.I.) – 18.06.2024
Foto Cifarelli
