Une cariere di liende, une presince sul palc e une vôs che no son stadis plui compagnis, fin cumò. Cuntune vite gloriose ma ancje plene di sfrutament, discomut e solitudin, cu la sô musiche e il fat di jessi impegnade tes bataiis pai dirits civîi, la cjantante jazz americane Nina Simone e je deventade une icone mondiâl. Ve chi alore il ritrat di une femine, artiste e combatente, tal spetacul “My Name is Nina”, in program vinars ai 15 tal auditorium “Venier” di Pasian di Prât. La produzion di Euritmica e je nassude di une idee de cjantante Graziella Vendramin e dal naratôr Valerio Marchi (za autôr di spetacui pal teatri e di saçs dedicâts a grancj personaçs de storie) che, doprant musiche, peraulis e fotos, a contin Nina Simone tai mitics Agns Sessante. Dongje de Vendramin, une des vôs plui bielis dal jazz de regjon, un grup di valôr cun Alessandro Scolz, Romano Todesco e Emanuel Donadelli. (A.I.) – 14.11.2024
Peraulis e musiche par Nina Simone
14
