Si intitule “Puints di musiche”, par sloven “Glasbeni mostovi”, il gnûf festival promovût de associazion musicâl Fadiesis di Pordenon, dentri de programazion di GO!2025, la prime Capitâl Europeane de Culture transfrontaliere. Cun cheste iniziative, la musiche e devente un puint culturâl dulà memoreâ, cjatâsi, tornâ a inventâ ducj adun. Al è propit il concet di puint che al unìs, al passe i confins e al cree un lûc di incuintri e di dialic tra popui, lenghis, culturis. Il puint de memorie al è metût ju’ dal conciert e de conte “Michele, Joško e chei altris: storiis di zovinis di là dai confins”, dedicât ai doi sindics visionaris Michele Martina e Joško Strukeli, che a àn svicinât Gurize a Gnove Gurize. Joibe ai 13 al sarà presentât tal Auditorium di Roncjis di Monfalcon di Carla Manzon (vôs) e Gianni Fassetta (armoniche), cun tescj di Romeo Pignat e musichis di Fassetta. (A.I.) – 12.03.2025
Foto di P. Grasso
