Ramazzotti al torne a vierzi ae musiche il stadi di Udin

Pal gnûf tour mondiâl, Eros Ramazzotti al torne intai stadis e al tache propit di Udin, dulà che sabide ai 6 di Jugn dal 2026 al torne a vierzi ae musiche ancje par chest Istât il Bluenergy Stadium. Inmaneât di “Friends and Partners”, FVG Music Live e VignaPR in colaborazion cun PromoTurismoFVG, il Comun di Udin e l’Udinese Calcio, il conciert di Udin al rive a vincj agns de ultime esibizion de stele romane in Friûl-Vignesie Julie. I biliets a saran in vendite des 10 di miercus ai 16 di Avrîl 2025 su Ticketone.it (informazions su: www.fvgmusiclive.it e www.vignapr.it). “Una storia importante” al è il titul di un tour che al conte il leam profont di Eros cul so public, une conession autentiche che e dure e che e passe il timp, i confins e lis gjenerazions. Une storie fate di musiche, emozions e di condivision, che si continue a scrivi cu la stesse fuarce di simpri, alimentade di plui di 80 milions di discs vendûts e passe 9,3 miliarts di scoltis in streaming. Prime dal tour mondiâl dal 2026, cuntune anteprime in Olande a Otubar, Ramazzotti al ripartìs si che duncje di Udin, in graciis de colaborazion de aministrazion comunâl cun chê regjonâl, la societât dal Udin, FVG Music Live e VignaPR, daspò di un studi resint de Universitât dal Friûl che al à confermât il rûl strategjic des “datis zero” e dai grancj avigniments musicâi pal turisim. (A.I.) – 14.04.2025