Sacîl capitâl dai zovins pianiscj

Une des competizions plui prestigjosis a nivel mondiâl e torne a Sacîl cu lis sôs fasis finâls, che a decretaran il vincidôr assolût pal 2024: al è il concors pianistic internazionâl “PianoFVG”, ideât e diret di Davide Fregona e fat cul Comun di Sacîl, la Regjon F-Vj e la Fondazione Friuli. Il concors al è nassût par meti in mostre i gnûfs talents de tastiere sot dai 30 agns che a vegnin di dut il mont: de Europe al Mediterani; de Cine e dal Orient estrem fint al Sudameriche e ai Stâts Unîts. Des provis finâls programadis tal Teatri Zancanaro tra il prin e i 3 di Mai, al vignarà fûr il vincidôr assolût de competizion pal bieni 2023-2024. Al tiermin de prime fase, l’an passât, di passe 40 partecipants che a vegnin di ben 11 Nazions a son stâts selezionâts sîs de prestigjose jurie internazionâl vuidade de innomenade pianiste slovene Dubravka Tomšič. I finaliscj a sunaran in dutis la trê lis zornadis lis provis dome par piano e in concierts serâi, vierts al public, cu la FVG Orchestra direte di Paolo Paroni. (A.I.) – 30.04.2024