Sience e cjançons intune par une sere

Un sienziât di innomine mondiâl, pari de nanomedisine, e un cjantautôr e atôr, vincidôr de Targa Tenco. Mauro Ferrari e Piero Sidoti a saran protagoniscj di un spetacul speciâl, miercus ai 6 tal Teatri Gnûf “Giovanni da Udine”: il titul al è “RiconoScienza”, un incuintri, anzit une convergjence di dôs realtâts dome in aparence lontanis – il sienziât che al cjante e al sune il saxofon par passetimp e il cjantautôr che al è ancje professôr di matematiche e siencis – insiemi par une esperience inedite e apassionante. L’avigniment, promovût de Fondazion “Ferrari e Famiglia”, al à ancje un intindiment benefic a pro de associazion La Nostra Famiglia. Il spetacul al varà un davuelziment ‘sientific’: cul acompagnament di un grup di sunadôrs, i doi protagoniscj a dialogaran su lis ultimis scuviertis sientifichis e farmacologjichis di Ferrari e a cjantaran tocs inedits di Sidoti. (A.I.) – 05.12.2023