Sperimentazions intal museu tal mieç dai vignâi

Al torne l’apontament estîf dedicât ae musiche contemporanie tal Vigne Museum di Rosacis, in comun di Manzan. Ancje cheste volte e sarà une imersion intes sonoritâts plui sperimentâls a contat strent cu la nature, intal museu a cîl viert dedicât ae vît e al paisaç, fat di Yona Friedman cun Jean-Baptiste Decavèle par onorâ i 100 agns di Livio Felluga. La colaborazion cun Simularte dentri di “More Than Jazz” e previôt, vinars ai 14 aes 9 sot sere, une cumbinazion uniche di improvisazion e musiche contemporanie par cure di Vincent Courtois (violoncel) e Zoe Pia (clarinet), che a puartaran il public intune aventure sonore cence confins cul conciert “Uncharted Soundscapes”. (A.I.) – 13.07.2023