Storiis tragjichis di nazions lontanis

A son lûcs e storiis che il “Pordenone Docs Fest” al continue a esplorâ. Iran, Turchie, Sirie e Ucraine, ancjemò sot dai rifletôrs pe cundizion des feminis, pe tragjedie dal taramot e pe vuere, a saran protagonistis ancje de edizion che e ven dal festival cinematografic di Cinemazero, dai 29 di Març ai 2 di Avrîl. Par cinc dîs, la citât si mudarà intun osservatori su la contemporaneitât, ufrint vogladis di autôrs internazionâi e talians, che cul documentari a son bogns di impiâ riflessions, cambiament e partecipazion. Tra lis tantis anteprimis nazionâls, a saran storiis intensis, buinis di svicinâ il public a popui e culturis lontanis, che nus rivuardin in maniere direte, intun mont simpri plui complès e leât. (A.I.) – 14.02.2023