Straulino al cjante Tite Grison a S. Zorç

Sabide ai 18 di Novembar, aes 6 e mieze sore sere, te sale conferencis di Vile Dora a S. Zorç di Noiâr al è programât il conciert di Lino Straulino su lis vilotis di Tite Grison, subit daspò des premiazions de seste edizion dal concors leterari in lenghe furlane “Vôs de Basse”, inmaneât dai Comuns di Cjarlins, Gonârs, Muçane, Porpêt, Prissinins e S. Zorç di Noiâr, midiant dal Sportel associât pe lenghe furlane e cul patrocini de Societât Filologjiche Furlane e de Cooperative Informazione Friulana / Radio Onde Furlane. Il cjantautôr cjargnel al sunarà cualchidune des composizions dal artist di Gonârs, che al à metût in musiche ancje componiments di altris leterâts furlans, cualchidun ancje tra i miôr autôrs de produzion poetiche dal Nûfcent. La iniziative e vûl jessi un omaç a cualchidune des figuris che a àn insiorât il panorame culturâl de Basse furlane, tant che Tita Marzuttini, ma ancje pre Zaneto (don Giovanni Schiff), Luciano Morandini, Alviero Negro, Pierluigi Visintin e Gina Marpillero. (A.I.) – 16.11.2023