Sucès pe ‘capitâl dai documentaris’

Si è sierade cuntun grant sucès la decime otave edizion di “Pordenone Docs Fest”. Ancjemò une volte, il festival dal documentari di Cinemazero al à confermât une partecipazion straordenarie dal public. Plui di 3.500 i biliets distacâts (in cressite costante) e 6 mil lis presincis in dut, cuntune grande partecipazion di zovins, tra proiezions, incuintris, taulis tarondis, laboratoris, cunvignis, concierts… Par cinc dîs, la citât e je stade ancjemò une volte “capitâl dal documentari”, cun 28 cines in anteprime nazionâl e plui di tresinte ospits dal mont: regjiscj, produtôrs, studiôs, esperts… Il Grant Premi de Jurie al è lât a doi cines, il francês “Un Pays en flammes” di Mona Convert e a “Light Memories” di Misha Vallejo Prut, consegnâts di trê regjiscj di innomine internazionâl. Il miôr cine a tematiche ecologjiche al è “The Fabolous Gold Harvesting Machine”, intant che “La Mutante” de cilene Constanza Tejo Roa si è adiudicade doi premis, chel de critiche e chel dai students di cine. (A.I.) – 08.04.2025