Dopo la anteprime li dal Kulturni Dom di Gurize che e à zontât musiciscj talians e slovens sul palc, si vierç joibe ai 26 la vincjesime seste edizion dal festival transfrontalîr “Jazz & Wine of Peace”. Fint a domenie ai 29 al puartarà i grancj nons dal jazz mondiâl in 18 concierts fra Cuei furlan e sloven, celebrant la pâs e la amicizie fra i popui, anticipant e maridant il spirt di Gurize-Nova Gorica capitâls de culture 2025. Inmaneât dal circul Controtempo di Cormons, il festival al ospitarà i concierts in 4 teatris e in 16 fra aziendis vitiviniculis e cjasis storichis, par un cartelon che di simpri al riclame miârs di personis, par metât de Austrie. Inte prime zornade, fra i protagoniscj, il pianist american Chris Jarrett a Vile Attems Cernozza di Postcastro, il fradi plui piçul de liende Keith, e al Teatri comunâl di Cormons “Viva De André”, la rileture jazz dai grancj classics dal cjantautôr gjenovês cul conciert/conte di Luigi Viva e un cuintet jazz che al cjape dentri il saxofonist furlan Francesco Bearzatti. A vierzi il festival il conciert Witch’ n’ Monk, aes 11 inte Cantine Jermann di Dolegne. (A.I.) – 24.10.2024
Foto di C. Blake
