Al è in linie il bant pe edizion gnove di Suns Europe: il festival des arts intes lenghis minorizadis de Europe nassût intal 2009 in Friûl, cûr multilengâl de Europe, inmaneât de cooperative Informazione Friulana, editore di Radio Onde Furlane, cu la poie finanziarie de Regjon e de ARLeF – Agjenzie Regjonâl pe Lenghe Furlane, intune cun cetancj sogjets publics e privâts, locâi e internazionâi. Il festival, come par solit, al cjatarà acet inte citât di Udin e in altris lûcs dal Friûl in Novembar e in Dicembar. Par mieç dal bant, i organizadôrs a cirin grups e musiciscj cuntune produzion artistiche e fate intune des lenghis espression des comunitâts minorizadis de Europe, daûr de definizion che si cjate intal articul 1 de Cjarte europeane des lenghis regjonâls o minoritariis. Par candidâsi, i artiscj a àn di compilâ dentri dai 11 di Mai dal 2025 il modul che si cjate tal sît www.sunseurope.com e la selezion e sarà fate dai organizadôrs dentri dai 15 di Jugn dal 2025. I artiscj e i grups selezionâts a saran invidâts a partecipâ al festival par sunâ dal vîf lis lôr cjançons intant de serade finâl dal festival che chest an si davuelzarà ai 6 di Dicembar. (A.I.) – 07.04.2025
Foto di L. Chiandoni
