Teatris di record pal circuit Ert dopo de pandemie

L’Ente Regionale Teatrale dal Friûl-Vignesie Julie al à presentât i risultâts des stagjons teatrâls 2021/2022 e la prime note positive e je che ducj i 28 teatris dal circuit a son rivâts a meti in sene i spetacui programâts, dopo des dôs stagjons a sangloç par vie de pandemie. A son stadis 218 lis datis realizadis: 198 di prose, musiche e danze dentri dai programs uficiâi e 20 fûr abonament o in colaborazion cun altris partners. I abonâts in dut a son stâts 4.734 e lis presincis, che a cjapin dentri i biliets cuistâts, 43.975. Il “Premi dal public” al è lât a “La Vedova Socrate”, un classic di Franca Valeri rapresentât di Lella Costa, po dopo i Oblivion e il classic contemporani “Ditele sempre di sì”. Cumò l’Ert al è daûr a lavorâ cu lis aministrazions comunâls par definî i cartei 2022/2023 che a partiran in Otubar. (A.I.) – 05.07.2022