Trê artiscj a Vile Manin par ‘fâ scoltâ’ il moviment

Joibe ai 27, a Vile Manin di Passarian, pe rassegne “Dialoghi”, si presente un spetacul ‘in residence’ di arts performativis viert al public. Si intitule “Liminal Electronica” e al è un progjet che al vûl fâ scoltâ il moviment, o fâ viodi il sun traviers la ‘performance’. Insume, al vûl rivâ a une fusion dai trê lengaçs su la fonde di un denominadôr in comun – chel de ossilazion – leât ai elements espressîfs de ripetizion, de variazion e de simetrie. Il progjet al cjape dentri trê artiscj: il ‘dissegnadôr di suns’ Antonio Della Marina, che ‘al sune’ struments eletronics mandâts fûr di cassis integradis intal cuarp de danzadore Camilla Isola, intun zûc di ombris e colôr realizât di Alessandra Zucchi. (A.I.) – 26.04.2023