Tresesin capitâl de ghitare acustiche

Cuindis formazions di Italie, Europe, Sudafriche e Indie, di vinars ai 22 a domenie ai 24 di Setembar pal decim otâf “Madame Guitar”, rassegne internazionâl di ghitare acustiche inmaneade a Tresesin dal Folk Club di Buri e dal Comun. Inte prime serade, al teatri “Garzoni”, a sunaran i dîs ghitariscj de furlane Adamantis Guitar Orchestra, direte di Raffaello Indri, po dopo il ghitarist sudafrican Nibs Van Der Spuy e il cuartet Arijtmia. Sabide si tache dopomisdì in Place Ellero e di sere si torne a teatri cul bluesman vienês Gottfried Gfrerer e il scozês Tony McManus. Domenie si partìs za di matine in Cjistiel e il dopomisdì il grant finâl in place a cjantâ “Madame Guitar”, il toc di Sergio Endrigo che al da il titul ae rassegne. (A.I.) – 21.09.2023