Ultins dîs pal cine in place intai paîs

Il schermi itinerant di “Cinemabulante” al siere il viaç de sô novesime edizion. La rassegne che e puarte il cine al viert intai piçui centris dal Friûl, riscuvierzint il plasê di cjatâsi devant di un telon, al à dât spazi come simpri aes produzions dal Friûl-Vignesie Julie che intai ultins agns si son fatis cognossi a nivel internazionâl, partecipant a rassegnis di ogni bande e cjapant premis. Vinars ai 2, intal parc de glesie di Porpêt, si tache cuntune cjaminade e un ghiringhel ae scuvierte dai tesaurs di aghe. Po dopo, proiezion dal cine “In un futuro aprile”, che al conte il Pasolini tai agns ’40 a Cjasarse, in presince dal regjist Federico Savonitto. Sabide ai 3 a Morùs, ultime cjaminade naturalistiche e po dopo, in place dal Tei, “Ulderica frute di mont” di Stefano Giacomuzzi, il ritrat de fotografe furlane Ulderica da Pozzo, e “Claps e Peraulis”, che al conte la poetesse Rosanna Bertoja. (A.I.) – 01.08.2024