Un arlêf di Berio tal Teatron

Secont apontament par “Berio100”, un percors trasversâl fat di musiche, intervistis e testemoneancis audio e video, pensât par svicinâ il public ae personalitât e al gjeni di un dai ‘paris’ de musiche dal Nûfcent. La rassegne, dentri de Stagjon di Musiche dal Teatri Gnûf “Giovanni da Udine” firmade dal diretôr artistic Paolo Cascio, e viodarà ospit miercus ai 26 Andrea Bacchetti, un dai pianiscj plui preseâts de sô gjenerazion a nivel internazionâl e esecutôr innomenât des oparis di Luciano Berio. Nassût intal 1977, Bacchetti al à lavorât cun Luciano Berio in variis ocasions, difondint la sô musiche in dut il mont. Intal conciert in program li dal Teatri Gnûf, al presentarà no dome musichis dal so ‘mestri’, ma ancje i tocs di compositôrs che plui i plasevin e che plui a àn stimolât la curiositât di Luciano Berio. (A.I.) – 25.03.2025