Un balet di Nadâl, ma intune version ‘dinamiche’

Il Teatri “Sociale” di Glemone al ospite “Lo schiaccianoci”, il balet che al incjarne la magjie e il spirt dal Nadâl, inte version ideade di Marco Batti pal Balletto di Siena su la coreografie origjinâl di Marius Petipa e cu lis musichis di Pëtr Il’ič Čajkovskij. L’apontament, presentât dentri dal percors “altris lengaçs” de stagjon teatrâl firmade dal ERT, al è in program miercus ai 11 cui danzadôrs de premiade compagnie toscane. Une des realtâts talianis plui dinamichis, cun elements che a vegnin di dut il mont e che e à al atîf passe trente produzions di spetacui che a metin dongje cure tecniche e un stîl di moviment cjariât di elegance e passion. (A.I.) – 10.12.2024