Un cine par Toros, il pari dal ‘model Friûl’

Operari, partesan, sindicalist, sotsegretari e ministri, Mario Toros (Pagnà, 1922 – Udin, 2018) al jere ancje il furlan al Guvier intal fatidic Mai dal 1976 e al à vût un rûl determinant inte gjestion de emergjence e de ricostruzion daspò il taramot. Intun Parlament disfat dopo la crisi di guvier di Avrîl e tornât a convocâ, al è stât lui a condusi la bataie par tradusi in leç il decret pe ricostruzion, che e meteve lis basis dal “model Friûl”. Vinars ai 5, la vilie dal cuarantesim setim aniversari dal taramot, al Cine Sociale di Glemone, la Cineteca del Friuli e presente “Toros ministro operaio”, l’ultin lavôr di Massimo Garlatti-Costa, promovût dal Ente Friuli nel mondo. (A.I.) – 04.05.2023