Un comic ‘di bessôl’ di Zelig al F-Vj

La comicitât di Claudio Batta e scree il 2025 di trê stagjons dal circuit dal ERT. “Solo” (Di bessôl), il spetacul che al celebre il miôr di trente agns di cariere, al sarà vinars ai 10 inte Aule grande des Scuelis Mediis di Manzan, inte suaze de stagjon dai Comuns de gjestion associade “Noi Cultura e Turismo”. Sabide ai 11 al vierzarà il cartelon dal Auditorium Comunâl di Talmassons e vinars ai 17 al sarà tal Auditorium Comunâl di Çopule. Di cuant che al à tacât a “Zelig” fint al dì di vuê, Claudio Batta al puarte in sene une comicitât semplice, elegante e mai volgâr. Il spetacul, scrit cun Riccardo Piferi, al ufrìs pussibilitâts di riflession tra une ridade e chê altre, in graciis de versatilitât dal artist, bon di interpretâ acents linguistics diviers. (A.I.) – 09.01.2025