La vincjesime seste edizion de rassegne internazionâl di musiche e teritoris “Nei suoni dei luoghi”, che e previôt 37 concierts in passe 25 comuns fint a Dicembar, e à sielzût ancje chest an cualchi lûc dai plui biei in Friûl-Vignesie Julie, ma ancje in Slovenie e in Austrie. Passe 150 i musiciscj, nons di nivel internazionâl e zovinis promessis de musiche classiche. Confermadis ae direzion artistiche Valentina Danelon e Gloria Campaner, si tache a Gurize vinars ai 7 cuntun event internazionâl. Tal dipuesit dal aeropuart “Duca d’Aosta”, l’Ensemble Miroirs Étendus al sunarà une opare dal compositôr di Gurize Fausto Romitelli, muart tal 2004. Dîs concierts a fasin part dai events di Go!2025: par esempli, chel dal cjantautôr Vasco Brondi, te doline dai bersalîrs su la Mont “Sei Busi” a Roncjis di Monfalcon. Un altri non cetant grant al è Vinicio Capossela, in Place dal Popul a S. Vît dal Tiliment cu la academie di arcs “Arrigoni”, ma a saran ancje altris stelis in lûcs di notâ, fint al conciert di sieradure a Tisane cul Quartetto d’Archi della Scala. (A.I.) – 06.06.2024
Un conciert tal dipuesit dal aeropuart
67