Un documentari pai 100 agns di Toros, il ministri operari

Al è stât un dai plui autorevui e influents oms politics dal Friûl-Vignesie Julie, ministri e sotsegretari di diviers guviers. Un politic cun basis solidis, che si è formât ancje traviers la lote partesane, il lavôr in fabriche e la esperience intal sindicât. Mario Toros al è il protagonist dal cine documentari biografic “Toros ministro operaio”, firmât dal regjist Massimo Garlatti-Costa, che al vignarà presentât in anteprime assolude vinars ai 24 aes 6.30 dal dopomisdì al cine Visionario di Udin (jentrade libare fin al esauriment dai puescj). Fat in ocasion dal centenari de nassite, il cine al è stât promovût dal Ent Friuli nel Mondo, che al à viodût Toros president par 21 agns. Al centri de conte, in particolâr, la stagjon che e à puartât ae aprovazion dal Statût dai Lavoradôrs, intal 1970, ancje in graciis dal ministri furlan de Democrazie Cristiane. (A.I.) – 22.02.2023