Un grup inglês al ‘batie’ il plaçâl de Cjase Rosse a Gurize

Un innomenât grup inglês, i Editors, al crearà un prin leam fra “Go! 2025” e Agrigento, a pene nomenade Capitâl taliane de culture pal stes an. Il grup musicâl, fra chei plui cuotâts dal rock indipendent britanic, al tignarà dome trê concierts in Italie cheste an: un inte citât siciliane e un a Gurize sabide ai 2 di Setembar, pe prime volte intal plaçâl di Cjase Rosse, un spazi dulà che e je pussibile la partecipazion di miârs di personis in sigurece. Il conciert a Gurize al è stât anunziât dal Gect Go, organizadôr in colaborazion cul Comun e Zenit srl, in concomitance cu la viertidure de vendite dai biliets. Lis tapis di svicinament al 2025 a jentrin duncje intal vîf cun iniziativis internazionâls di musiche tant che il conciert de band di Birmingham, che di cuasi vincj agns e presente un nivel creatîf cetant alt cuntune rispueste positive dal public. (A.I.) – 12.04.2023