Un ‘mostri’ de ghitare tal Teatron

Cinc apontaments tai plui impuartants teatris di Udin par ‘Note Nuove’ (Notis gnovis), la rassegne di musiche jazz inmaneade di Euritmica, che l’Istât passât e à sierât une edizion straordenarie di “Udin&Jazz”. Il prin apontament al e’ za joibe ai 31 di Otubar li dal teatri gnûf ‘Giovanni da Udine’ cuntun ‘mostri’ de ghitare: Pat Metheny. Artist cun 50 discs jessûts e par vincj voltis premiât cul ‘Grammy Award’, al puarte une date dal tour di ‘Moon dial’, fate di tocs gnûfs e altris scrits vie par une cariere lungje e fortunade, sunâts suntun instrument un tic stramp, come che al fâs cuasi simpri. Ai 20 di Novembar tal Palamostre, Cristiano Godano dai Marlene Kuntz e il ghitarist Alessandro ‘Asso’ Stefana a sunin lis cjançons di Neil Young tal progjet “Journey through the past”, viaç tal passât. Ai 29, tal auditorium Zanon, il Jazz Organ Trio dal ghitarist Andrea Braido al fasarà un omaç a Jimi Hendrix, ospitant Alessio Velliscig ae vôs. In Dicembar al rivarà Paolo Fresu cul so grup e par sierâ, ai 27 di Fevrâr al Teatron, Stefano Bollani di bessôl al piano. (A.I.) – 30.10.2024