Il musical “Saranno famosi” (A saran famôs), che al à apassionât une gjenerazion daûr di chê altre, al rive tal Teatri gnûf “Giovanni da Udine”, di vinars ai 21 a domenie ai 23. Tal prin, un cine cetant amât cu la regjie di Alan Parker (1980), po dopo un straordenari musical e ancje une serie pe television fra chês plui famosis e di no podê dismenteâ: al è dificil meti in struc in pocjis riis il sucès planetari di “Fame”, un fenomen di liende de culture pop. Lis vicendis di un grup di arlêfs de scuele esclusive di Performing Arts di New York e dai lôr insegnants a continuin a inmagâ lis gjenerazions di îr e di vuê e a ricjapin vite inte gnove version firmade di Luciano Cannito cu la compagnie Roma City Musical: un trionf di cjant, danze, musiche e recitazion. (A.I.) – 19.02.2025
Foto di V. Polverari
