Un regjist svedês di origjins gurizanis al zirarà un cine sul confin

Gnûf episodi a Gurize di “Via della creatività” (Vie de creativitât), la residence par artiscj cinematografics curade di Francesco Ranieri Martinott inte suaze di BorGO Cinema, il progjet finanziât de Regjon. Protagoniscj di chestis gnovis trê residencis a son il regjist Maurizio Sciarra (vincidôr dal Pardo di aur tal Festival di Locarno 2001), il fotograf naturalizât svedês di origjins gurizanis (i siei antenâts a jerin di Lucinîs, Pudigori e Vipolzano) Joakim Kocjancic e il compositôr ucrain di colonis sonoris Oleksii Lupashko. Trê artiscj che a lavoraran su progjets che a instrecin memorie e teritori. Kocjancic al zirarà une pelicule dute in blanc e neri che e documentarà la vite urbane di Gurize e di Gnove Gurize tant che une sole realtât condividude, di là dai confins. Une vision de citât che si môf jenfri passât e presint, cuntune cjalade ispirade al cine surealist dai agns ’20. (A.I.) – 22.02.2025